13-anyos gisulayan og rape, giluba kadaghan

CEBU - Kritikal ang kahimtang sa usa ka 13 anyos nga dalagita human kini makaangkon og daghang samad dinunggaban sa iyang ulo ug lawas human misukol sa suspetsado nga buot untang molugos kaniya nga nag-atang sa kalibunan nga bahin didto sa barangay Upper Bantolinao, lungsod sa Sogod niadtong Sabado sa alas 5 sa hapon.

Ang biktima nga 13 anyos   nalandig pa karon sa tambalanan dinhi sa dakbayan sa Sugbu samtang ang rapist nga wala pa mailhi ang pangalan gihulagway kini sa biktima nga nagsul-ob og sleeveless nga kolor puti ug nag-short og maong.

Matud ni SPO3 Joemiller Baticuang, officer-in-charge sa Sogod Police Station sa dihang nahinabi sa Banat News subay sa inisyal niining imbestigasyon nga samtang nanguha og dahon sa Ipil-ipil ang biktima aron unta i-kompay sa ilang mga hayop, giatngan kini sa suspek sa dalan ug gigunitan ang tuong bukton niini ug giguyod paingon sa kalibunan.

Didto gimanduan ang biktima   nga pahuboon sa iyang sapot apan misukol kini ug gipatiran ang rapist hinungdan nga naglagot kini ug mikuha sa iyang kutsilyo dayon gidunggab dunggab sa biktima sa makadaghang higayon.

Na-atol nga dunay usa ka babaye nga naagi sa lugar ug nakamatikod sa nahitabong komosyon ug daling misinggit pagpangayo og tabang sa mga silingan.

Tungod sa kahadlok nga masakpan ang suspek nagdali kini og dagan pahilayo biniyaan ang biktima nga nagkadugo na ang nawong ug sapot tungod sa samad dinunggaban ug gihatod dayon kini sa Juan Dosado Memorial Hospital sa Sogod apan girekomendar sa mga doktor nga ipaderetso sa tambalanan dinhi sa dakbayan tungod sa seryosong kahimtang niini. Hinuon gikonpirmar ni SPO3 Baticuang nga wala mahilabti ang biktima tungod kay wala man matandog ang sapot niini gawas lang sa mga samad dinunggaban niining naangkon.

Ang kapolisan padayon pa sa ilang imbestigasyon pagtumbok ug pagsikop sa suspek.  (BANAT NEWS)