Tulisan taga-Mindanao gi-monitor sa Lapu

 CEBU - Gialerto karon sa kapolisan sa dakbayan sa Lapulapu ang tanang mga substation nunot sa usa ka intelligence report nga nia sa Sugbu ang mga Mindanao-based nga tulisan nga buot mosabod og kasamok sa nagkaduol nga Pasko.

Si Lapulapu City Police OIC Director Sr. Supt. Mariano Natuel Jr. sa pakighinabi sa Banat News nagkanayon nga human niya nadawat ang kompirmasyon sa rehiyonal nga buhatan sa PNP nga nia na sa Sugbu ang mga tulisan gikan sa Mindanao iya dayong gipa-monitor sa iyang mga sakop ang tagsatagsa nila ka area of responsibilities aron masuta kun wala ba himoa nga lugar “para sa rest and recreation” kun R&R ang dakbayan sa Lapulapu sa mga tulisan.

 Kahinumduman nga sa milabay’ng tuig usa ka barangay sa dakbayan sa Lapulapu ang gipuy-an sa mga tulisan diin sa maong dapit sila nagplano kun kinsa ug asa ang target nilang tulison sa dakbayan sa Sugbu, Mandaue ug sa Lapulapu.

 Gumikan niini mimando si Natuel sa iyang lima ka mga presinto sa kapolisan nga mag-igmat sa ilang mga area aron dili kini malutsan sa mga dautang elemento sa katilingban.

 Samtang giawhag usab ni Sr. Supt. Natuel nga moabag ang katawhan sa paghatag og impormasyon o modangop sa labing duol nga estasyon sa kapolisan sa ilang dapit kun duna kini mamatikdang katahapan nga lihok sa mga bag-ong salta sa ilang dapit aron kini masusi sa mga sakop sa kapolisan. – BANAT NEWS