CEBU - Usa ka mag-uuma nga taga sitio Catibis, barangay Guba ning dakbayan sa Sugbo kinsa miyarok og usa ka botelyang 250 ml. nga hilo sa mga dangan sa kaumahan, patay nang midangat sa tambalanan niadtong miaging buntag.
Ang naghikog giila sa kapulisan nga si Ceriaca Leson Cogtas, 47, dalaga, adunay ka-live-in ug mag-uuma sa nahisgutang lugar.
Sa imbestigasyon nga gihimo nila ni SPO4 Alex Dacua, ang ka live-in sa nagpakamatay nga si Josephine Cañete, 43, tomboy, ug walay trabaho, maoy nakabangal ni Ceriaca nga wala nay kinabuhi sulod sa gi-abandonar nga balay sa ilang lugar.
Matud pa ni Josephine nga nakit-an nalang niya ang iyang ka live-in nga nagbuy-od nga nagbuwa pa ang baba niini hinungdan nga nangayo siya'g pakitabang sa ilang mga silingan.
Gidali dayon nila ngadto sa Guba Community District Hospital apan gideklarar kining dead on arrival.
Hinuon sa paghiling sa mga imbestigador sa kapulisan sa patay'ng lawas ni Ceriaca, wala sila'y nakitang mga bun-og o kaha samad, timaan nga namatay kini pinaagi gyud sa paghikog. – BANAT NEWS