Nanghulga sa RTC-Mandaue Gisikop

CEBU - Nadakpan kagahapon ang usa ka babaye nga giingong maoy nagpadala og sulat ngadto sa Mandaue City Hall of Justice ug nanghulgang bombahan ang maong edipisyo sa mga sakop sa Moro Islamic Liberation Front (MILF).

Si Erlinda Cagata nga adunay pending nga kasong estafa sa sala ni Regional Trial Court Branch 56 gidakop human sa hearing kagahapon tungod sa bench warrant nga giisyu ni Judge Teresita Galanida.

Human gibisita ni Mandaue City Police OIC Director Supt. Mersan Premne ang Hall of Justice, nagdali kini sa pagbiya aron sa pagpangita sa nagpadala sa sulat.

Usa ka lalaki ang mitumbok kang Cagata nga maoy nagpadala sa sulat nga nanghulgang bombahan sa MILF ang Hall of Justice.

Ang sulat gipadala pinaagi sa LBC.

Si Supt. Premne nagkanayon sa dihang nahinabi sa ABS-CBN nga base sa na-establisar nga motibo, dako ilang pagtuo nga si Cagata ang nagpadala og sulat nga nagpailang si Celing Toleron ug nangangkon nga sakop sa MILF ang iyang bana.

Ang sulat sa usa ka Celing Toleron mipasidaan kang Galanida nga dili ihinayon og pagdungog ang usa ka kaso aron malikayan ang pag-ulbo sa bomba sa Palasyo sa Hustisya pinaagi sa MILF.

Ang maong sulat nakaukay sa mga kawani sa mga korte sa Mandaue.

Ang Special Weapons and Tactics sa Mandaue mihimo gilayon og clearing operation, apan nasuta nga negatibo sa bomba sa palibot sa Palasyo sa Hustisya.

Hinuon, nahibalik na kagahapon ang normal nga operasyon sa mga korte, samtang si Supt. Premne mibutang og mga unipormadong mga polis sa Station 1 ug 2 aron magpadayon sa pagbantay sa palibot sa edipisyo. – BANAT NEWS