CEBU - Gi-kwestyon karon ang legalidad sa gitukod nga barangay hall sa Poblacion, Boljoon kay naa kini itarok sa yuta nga gi-deklarar nga national heritage .
Ang pagkuwestyon gihimo ni Manny Derama , ang tsirman sa zoning board , ug ig-agaw ni Mayor Deogenes Wargong Derama sa Boljoon.
Matud pa ni Derama nga daan nang gitarok ang maong barangay hall ni barangay captain Teresita Celis niadtong 2004 apan wala kini matiwas hangtod nga nahimo siyang (Celis) membro sa provincial board.
Midugang si Derama nga ang nakasanta sa maong proyekto niadtong higayona mao ra usab si kanhi Vice Mayor Renato Amper tungod kay giingong ilegal ang pagkatukod niini.
Apan miingon si Derama nga puwerte niyang kurata dihang namatngonan niya niadtong miaging Marso nga gipadayon na usab ang pagpanday sa maong edipisyo, usa ka tuig kapin human mamatay si Amper.
Busa mihagit si Derama nga siya maoy magpadayon sa pagsupak niini ug nangandam siya karon aron ipadangat kining kasoha ngadto sa Municipal Zoning Administrator nga si Engr. Corazon Medida. (BANAT NEWS)