Patay nang nahidangat sa tambalanan ang usa ka 6-anyos nga batang lalaki human kini nadasmagan sa naghaguros nga motorsiklo sa sitio Sta. Cruz barangay Tapilon lungsod sa Daanbantayan niadtong Domingo sa alas 4:30 sa hapon.
Ang biktima nga nakabsan gyud sa kinabuhi mao si Janfer Dublin, molupyo sa nahisgutang lugar samtang ang drayber sa motorsiklo nga nakadasmag mao si Arnel Alburo,residente ra usab sa maong barangay.
Matud ni PO1 Columbus Noynay sa Daanbantayan Police dihang nahinabi sa Banat News gikan sa barangay Maya si Alburo paingon na unta mopauli niadtong tungura.
Apan paghiabot niini sa nahisgutang lugar kalit nga nilabang sa karsada ang bata ug naapikihan si Alburo pag- brake hinungdan nga nadasmagan gyud niini ang biktima.
Gisuwayan unta pagdala ang biktima sa Daanbantayan District Hospital apan gideklarar kining dead on arrival (DOA) sa mga doctor, gikatahong may dakong samad diha sa ulo nga gituuhang nakaingon sa hinanaling kamatayon niini.
Ang drayber sa motor boluntaryo sab dayung nitahan sa iyang kaugalingon sa kapulisan ug kagahapong adlawa giandam ang pagpasaka og kasong reckless imprudence resulting to homicide batok kaniya.