CEBU – Dili kumbinsido si Konsehal Arsenio Pacaña sa giluwatang pamahayag sa usa ka Chinese health official nga luwas na sa melamine ang mga milk products sa China.
Si Dr. Liu Quian, China’s vice minister for health, mipahibawo nga moabot sa 5 mil ka food inspector ug examiner ang ilang gi-station sa tanang dairy company sa ilang nasod.
Kini aron maoy estriktong mo-monitor sa dairy ug milk production sa pagseguro nga dili na masagulan sa makadaot nga kemikal nga melamine.
Apan matud ni Konsehal Pacaña nga lisod katuuhan ang pamahayag sa Chinese health official tungod sa namugna nga milk scare sa tibuok kalibutan.
“Dili ta makasalig anang ilang pamahayag, parehas ra man na sa giingon nga suwayi lang ninyo total ilhan bitaw na inig autopsy,” sumala ni Pacaña.
Ang konsehal nga maoy chairman sa Committee on Trade and Commerce sa City Council niingon nga angayang likayan lang una ang mga China-made milk products.
Kini samtang wala pa ilibkas sa Department of Health (DOH) ang pag-ban niini sa nahisgutang kontrobersyal nga mga produkto.
Sa nasayran, 72 pa lang ka dairy ug milk products nga gikan sa China ang napaubos sa testing sa Bureau of Food and Drugs (BFAD).
Sa nahisgutang gidaghanon, tulo niini ang nasuta nga positibo sa melamine content ug delikado sa panglawas sa katawhan ilabi na sa kabataan.
Kini mao ang Greenfood Yili Fresh Milk, Mengniu Drink ug ang Jolly Cow Slender High Calcium Low Fat Milk (1 liter).
Subay niini ang DOH mimugna na og inter-agency condemnation committee nga maoy tahasan kung unsaon paghipos ang mga produkto nga kontaminado sa melamine.
Ang maong komitiba gilangkuban sa mga representante gikan sa Bureau of Customs, Department of Agriculture, DOH, DENR, EMB, DTI ug uban pa. – BANAT NEWS