CEBU - Natagak sa kimba ang usa ka ten wheeler trucks nga puno sa karga niining mga balas human masipyat og banabana ang drayber niini pag-agi sa kurbadahon nga dalan didto sa bukirang bahin sa Sitio Bogo, barangay Kawasan, lungsod sa Aloguinsan kagahapon sa alas 10 sa buntag.
Ang maong ten wheeler truck gimaneho sa usa ka Oscar Murpoz, 48, minyo ug molupyo sa dakbayan sa Toledo ug kauban ang 24-anyos nga anak niini nga si George.
Ang tag-iya sa maong sakyanan nga nadisgrasya mao ang usa ka Josepino Bangojan nga nanag-iya og construction firm nga nagbase sa siyudad sa Toledo.
Matud ni PO3 Albert Triplitt, officer in charge sa Aloguinsan Police Station dihang nahinabi sa Banat News gikan sa dakbayan sa Toledo ang maong dump trucks ug puno kini sa karga nga mga balas aron i-deliber didto sa lungsod sa Barili.
Apan subay sa inisyal nga imbestigasyon nasipyat og banabana ang drayber nga si Murpoz paghiabot sa kurbadahon nga lugar tungod usab sa kagamay sa maong dalan hinungdan nga natapigas sa kimba ang ligid niini ug mibalitok ang maong ten wheeler trucks nga miresulta sa pagkatagak niini ngadto sa lima ka tiil ang gilawmon.
Hinuon natabang sa mga molupyo sa maong lugar ang drayber ug ang anak niining nagsilbing helper diha sa front seat ug dali kining nakuha gikan sa sakyanan ug igo lang nakaangkon og pangos sa tiil ang drayber. (BANAT NEWS)