Rehab centers susihon

CEBU - Si Dangerous Drugs Board Undersecretary Atty. Paul Clarence Oaminal, mipasidaan nga ilang gukdon ang mga accredited nga drug rehabilitation centers dinhi sa nasud nga moabuso sa ilang mga pasyenteng mga gipailawom sa rehabilitation.

Si Usec Oaminal dihang nahinabi sa Banat News nga dili nila palabyon ang mga reklamong may labot sa dili maayong binuhatan sa mga empleyado sa mga accredited rehabilitation centers.

Gipadayag niini nga ang DDB nihulma niadtong Huwebes sa usa ka Task Force aron pagsusi sa mga reklamo tungod sa kadaghan na sa mga report nga ilang nadawat kabahin niini.

Sumala pa ni Oaminal dunay mga drug dependents nga gisulod sa mga drug rehabilitation centers ang mireklamong sila kulatahon ug binabuyon imbes nga trataron isip mga pasyente ug tabangang makarekober.

“This task force could initiate, conduct investigation on complaints against maltreatments in drug rehabilitation centers,” asoy pang Oaminal.

Ang maong pundok pangulohan unya ni Undersecretary Jade Delmondo sa Department of Health isip tsirman ug vice chairman si Usec Edgar Galvante.

Matud pa ni Oaminal, ubos sa Republic Act 9165 section 81 ang DDB gihatagan og gahum sa pag-umol sa maong task force hinungdan nga inihap nalang karon ang mga adlaw sa mga binuang sa mga drug rehabilitation centers.

Kung mapamatud-ang gimaltrato sa mga counselors o ba kaha mga staffs sa mga drug rehabilitation centers ang ilang mga drug dependent patients hayan matangtangan sila og accreditation ug mapasirhan gawas pa sa posibleng kasong kriminal nga ipasaka unya sa mga reklamante. (BANAT NEWS)