CEBU – Gilusad na sa United Banawa-Englis Association Incorporated ang signature campaign alang sa hingpit nang pagbuwag sa duha ka sitio gikan sa barangay Guadalupe.
Ang Bise Presidente sa asosasyon kinsa maoy nangusog sa signature campaign, Jaime Sala, miingon nga mokapin sa 5,000 ka pirma ang ilang nahipos kagahapong adlawa.
Gipahigayon ang signature campaign diha sa simbahan sa Alliance of Two Hearts sa Banawa pinaagi usab sa pagpakig-alayon sa parokya.
“I-anunsyo man sa pari inig human sa misa nga mipahigayon ta og signature campaign mao nga mopirma sab ang mga nanimba nga pabor sa atong tumong,” ni Sala pa.
Matud usab niini nga labing ubos 8,000 ka pirma sa mga botante sa sitio sa Banawa ug Englis ang ilang gikinahanglan sa nahisgutang kampanya.
Ang mahipos unya nga mga pirma maoy isuporta sa asosasyon ngadto sa balaudnon nga gipalabang ni Kongresista Antonio Cuenco.
Kahinumduman nga ang kongresista mipalabang na sa House Bill 5234 niadtong miaging semana nga magbuwag unya sa duha ka sitio gikan sa barangay Guadalupe.
Nagkanayon si Sala nga ipadayon nila ang ilang nasugdan nga signature campaign niining semanaha aron hingpit nga makuha ang ilang target nga mga pirma.
Sa pikas bahin, gipahibawo ni Sala nga mosuwat usab sila ngadto sa konseho sa ilang barangay labot sa ilang tinguha pagpa-repeal sa usa ka ordinansa sa Guadalupe.
Kini may kalabutan sa barangay ordinance nga nagkwestiyon sa utlanan nga maoy nakapugong kaniadto sa Comelec pagpahigayon og plebisito.
Miingon si Sala nga sila gipasaligan na nilang Konsehal Fred Gallardo ug Robert Camu nga maoy mangamahan unya sa ordinansahon.
Dili pa hinoon matino kung mapalabang ba ang nahisgutang ordinansahon atol sa sesyon sa barangay ugmang adlawa.
Una nang gipasalig ni Guadalupe Barangay Captain Jingjing Faelnar nga sila dili supak nga mabuwag ang duha ka sitio kung kini maoy gusto sa mga molupyo. – BANAT NEWS