P221M nga proyekto sa Mandaue wa pa mahuman

CEBU – Mokabat sa P221 milyones ang kantidad sa mga proyekto nga gipatuman sa kagamhanan sa dakbayan sa Mandaue ang nagpabilin pa nga wala mahuman.

Ang pipila niini ang gipadayon sa pagtrabaho ug ang pipila usab ang nahunong sa pagtrabaho.

Kini nasayran subay sa taho ni City Engineer Antonio Sanchez kinsa miingon nga ang maong mga proyekto nga wala mahuman ang gilangkuban kini sa mokabat P192 milyones sa administrasyon ni kanhi Mayor Thadeo Ouano ug P28.8 milyones nga kantidad sa kasamtangan karong administrasyon ni Mayor Jonas Cortes.

Sa iyang taho ni Sanchez maoy iyang gipasabot nga proseso sa mga dokumento maoy makalangan sa kaugmaran sa maong mga proyekto nga molungtad og upat ka bulan ngadto sa pito ka bulan ang pagproseso sa mga dokumento.

Naglakip sa mga nakaingon sa kalangan sa gipatuman nga mga proyekto mao ang taas kaayong proseso alang sa pagkuha og business permit wala pay labot ang pag-bidding hangtod na ang pagpinirmahay sa kontrata ngadto sa modaog nga kontraktor niini. – BANAT NEWS