CEBU – Nabulit sa samad sa mga bala ang lawas sa usa ka sakop sa Tau Gamma Fraternity ug kritikal ang kahimtang niini, samtang ang kauban niining babaye tiil ray samdan human sila pamusila sa wala hiilhing mga tawo alas 2:00 pasado sa miaging kaadlawon didto sa sitio Humay-Humay sa barangay Pajo, dakbayan sa Lapulapu.
Ang mga biktima mao sila si Nelson Nillama Jr., 21, ulitawo nga taga Lapulapu City, ug Gina Saram Pascua, 26, taga barangay Ukoy, Santa Fe, Cebu.
Si Nillama samdan sa kilid ug uban pang bahin sa lawas , samtang si Pascua tiil ray nasabak sa usa ka bala.
Sa nasayran sa Banat News kang SPO3 Rolito Jumao-as sa homicide section sa kapolisan sa maong dakbayan nga nag-inom ang mga biktima sa sulod sa usa ka videokehan dihang may duha ka mga batan-ong lalake ang kalit lang mitumaw ug namusil .
Matud pa ni SPO3 Jumao-as nga dali usab kaayong nakasibat ang duha ka kriminal ug wala na kini nila hiabti sa ilang pag-abot sa lugar nga nahitaboan.
Ang mga biktima unang gidala sa Lapulapu District Hospital apan gibalhin kini sa Vicente Sotto Memorial Medical Center sa dakbayan sa Sugbu. – BANAT NEWS