Pinusilay sa duha ka batan-ong lalaki gumikan lang sa giilugang babaye niresulta sa pagkaangol sa laing babaye nga nag-tan-aw og internet diha sa Gines St. Tagutungan, barangay Sawang Calero ning dakbayan mga alas 12:30 kagahapon sa kaadlawon.
Usa ka Jogie Cabasan, 20, 1st year high school sa Gothong National High School naigo sa tuong bahin sa bitiis gikan sa wala pa matinong armas.
Sa imbestigasyon nila ni SPO4 Alex Dacua sa Homicide Section ang duha ka mga suspetsado nga ginganlan og Marino Tampuz ug Roel “Butchoy” Bindol gikatahong pulos nagdala’g armas.
Ang duha nagkalalis diha daplin sa dalan ug dihang nagkainitay na ug nagbunutay sa ilang mga armas ug nagpinusilay ang duha ka mga suspetsado apan wala mag-ig-anay ug ang biktima maoy napagan.
Ang duruha daling nakasibat ug wala maabti pa sa mga mirespondeng polis samtang ang biktima gidali sa pagdala sa Cebu City Medical Center.
Ang hepe sa Homicide Section Sr. Insp. Mario Monilar nagkanayon nga ang duha nagkalalis ug nagkapinusilay gumikan lang sa selos gikan sa usa ka babaye.
Samtang usa ka residente sa dapit kinsa nahinabi sa Banat News nga wa magpaila nikunpirmar nga ang babaye nga ilang giilugan gikatahong ka live-in niadto ni Bindol ug gikatahong gikaipon na usab karon ni Tampuz.