CEBU - Ang hepe sa Cebu City Police Office Sr. Supt. Patrocinio Comendador andam mosunod sa kamanduan sa Philippine National Police (PNP) nga dili I-presentar sa publiko ang ilang mga dinakpan.
Kini maoy tubag ni Comendador human ang bag-ong PNP chief sa nasud Jesus Versosa mopatuman karong mosunod nga semana sa polisiya nga did-an ang kapolisan sa pagpresentar sa ilang dinakpan.
Ang maong lakang nahuna-hunaan ni Versosa human ang mga sakop sa Commission on Human Rights (CHR) miawhag kaniya aron maprotektahan ang mga katungod niini gumikan kay dili pa kini mga konbiktado.
Matud pa ni Comendador nga wala pa siya makabasa sa memorandum circular apan kun ugaling maabot kini ila gilayon kining ipatuman.
Apan sa iyang bahin ang maong lakang usa kini ka ‘case-to-case’ basis gumikan kay dunay mga panahon nga gikinahanglang mahibalo ang publiko sama niadtong nabiktima sa tulis ug uban pang krimen buot moila sa mibiktima kanila.
Gipasabot niini nga sa maong polisiya angayang adunay mga ‘specific’ nga butang nga pagasundon gumikan kay dunay mga panghitabo nga gikinahanglang ipakita sa publiko ang ilang mga dinakpan.
Mas pabor si Comendador nga kadtong mga nalambigit sa heinous crime, pagpanglugos sa mga minor de edad, minor de edad ang mga suspect ug mga brutal nga krimen dili gyud ipresentar. – BANAT NEWS