Mokabat sa 3,000 ka learners nitapos sa ALS

CEBU - Dul-an sa 3,000 ka mga learners sa dakbayan sa Sugbo nga bag-o lang nitapos sa Alternative Learning System (ALS) ang gitakdang mopaubos sa ALS Accreditation and Equivalency (A&E) Test nga gitakda karong Oktobre 12.

Kini maoy gibutyag ni konsehal Gerardo “Gerry” Carillo, ang tsirman sa Committee on Education sa konseho sa siyudad.

Niingon ang konsehal nga lakip sa mokuha sa nahisgutang pasulit mao ang kapin sa 200 ka mga empleyado sa Cebu City Hall.

Kadaghanan hinoon sa mga learners giingong nagagikan sa 30 ka mga barangay sa siyudad nga duna nay ALS program.

Matud ni Carillo nga nisugod na sa pag-review ang 2,800 ka mga learners agi og pagpangandam sa umaabot nga ALS A&E Test.

Nagkanayon ang konsehal nga kadtong makapasar sa nahisgutang pasulit siguradong makadawat og diploma sa elementarya  o  sa high school.

“They will be given diplomas unya duna na silay kahigayonan nga makapadayon pagtungha sa high school o sa kolehiyo,” sumala ni Carillo.

Labaw sa tanan niingon ang konsehal nga mahatagan usab ang mga learners ug kahigayonan alang sa pagpangita og maayong trabaho.

Gipadayag ni Carillo nga ang ALS program diha sa kabarangayan gipasiugdahan sa dakbayan uban usab sa pagpakigtambayayong sa Department of Education (DepEd).

Gipasalig sa konsehal nga sa sunod buwan, ila nang palapdan ang programa ug dili lang sa 30 ka mga barangay kun dili sa tanang 80 ka mga barangay sa siyudad.

Gipasabot ni Carillo nga ang ilang tumong niini mao ang paghatag og kahigayonan sa tanang molupyo sa dakbayan nga makahupot og diploma.

Giklaro sa konsehal nga libre ang ALS program ug walay bayad diin ang buhaton sa mga interesado moduol lang sa barangay o sa iyang buhatan alang sa dugang kasayoran.

Nasayran nga sa miaging buwan sa Hunyo nga ALS A&E Test, dul-an sa 20 ka mga kawani sa MCWD ang nakapasar sa nahisgutang pasulit. – BANAT NEWS