CEBU - Human susiha ang mga produktong gatas ug mga chocolate products gisugdan na usab sa Bureau of Food and Drugs (BFAD-7) ang pagpanghabwa sa mga Chinese candies nga gibaligya sa katindahanan dinhi sa Sugbu.
Gibutyag sa hepe sa regulatory division sa BFAD-7 Monina Coyoca nga gihabwa ug gikuhaan nila og mga sample ang mga Chinese candies aron masusi kini sa posibling sagol nga melamine.
Gitumbok ni Monina nga ang mga Chinese candies nga gipamaligya sa katindahanan dinhi sa Sugbu nakalanag sa mga tinun-an sa nagkalain laing tunghaan sa probinsya sa milabay’ng mga bulan.
Busa subling gipasidan-an ni Coyoca ang publiko nga likayan lang una ang pagkaon sa mga candy sa Insek ingon man mga produktong chocolate nga gipabrika sa China kauban sa mga produktong gatas.
Kini samtang wala pay resulta ang gipahigayong pakisusi sa ilang mga health expert sa BFAD-Manila nga maoy mihiling sa mga nakuha nilang sample ning maong mga produkto.
Hinuon gipadayag ni Coyoca nga walay hunong ang gihimong pakisusi sa ilang mga eksperto didto sa Manila sa maong mga sample pagsuta kun duna ba kini melamine content nga una nang nakahatag og sakit sa kaliboan ka mga bata nga nagpangidaron og 2 ngadto sa 3 anyos didto sa China tungod sa kontaminadong gatas nga nainom niini nga gibaligya sa maong nasud.
Gipasalig ni Coyoca nga sulod sa duha ngadto sa tulo ka semana gikan karon mogawas na ang resulta sa pakisusi sa maong mga sample ug mahibaw-an na unya kun duna bay melamine content.
Nasayran nga dunay 52 ka mga lain laing produkto sa gatas ingon man mga chocolate products nga dunay sagol nga gatas nga ginama sa China nga gipamaligya sa katindahanan dinhi sa Sugbu ang gikuha-an og mga sample sa BFAD-Manila pagtino kun luwas ba kini sa publiko. – BANAT NEWS