CEBU - Hayag na ang kaluwasan sa 23 ka mga Overseas Filipino Workers (OFW) nga gitanggong karon sa ilang gitrabahoan sa Republic of Trinidad and Tobago human makapangayo og hinabang ang 15 ka mga asawa nila kang Mandaue City Vice Mayor Carlo Fortuna.
Nadawat ni Fortuna ang pasalig sa kasiguroan sa kaluwasan sa 23 ka mga OFW pinaagi sa abogado sa Department of Foreign Affairs, Peachy Sarmiento nga iyang nahinabi niadtong miaging adlaw.
Matud pa ni Fortuna nga gihatagan na og abogado sa Department of Foreign Affairs (DFA) ang maong mga trabahante nga maoy moatiman sa ilang kaso aron sila makagawas ug makapauli nganhi sa Sugbo.
Usa sa 23 ka mga OFW nga gitanggong karon didto sa Republic of Trinidad mao si Engr. Jaqueline Ann Fortuna nga taga dakbayan sa Mandaue ug kabanay usab ni Bise Mayor Fortuna.
Samtang ang 22 ka kauban ni Fortuna, mga lumad sa isla sa Camotes niining lalawigan sa Sugbo.
Gidakop sila sa mga otoridad didto sa Trinidad tungod kay mini ang ilang mga papeles nga gihikay sa usa ka ahensiya nga nagbase sa dakbayan sa Sugbo.
Ang maong mga OFW migikan sa Mactan International Airport (MCIA) niadtong bulan sa Hunyo apan nadakpan sila sa mga otoridad sa paglabay sa pipila ka semana sa bulan sa Septiyembre. – BANAT NEWS