Duha ka sunog, 21-balay ugdaw

CEBU – Halos magkadungan ang sunog nga nahitabo sa dakbayan sa Mandaue ug Lapulapu kagahapon sa hapon diin pulos nga gagmay'ng panimalay ang nangaugdaw.

Unang alarma sa sunog mga alas 3:00 kagahapon sa hapon mao ang sunog sa barangay Looc dakbayan sa Lapulapu diin giisa ngadto sa 3rd alarm ug nakontrolar sulod sa upat ka minutos ug pagka alas 3:15 kagahapon sa hapon sunog na usab sa sitio Zone Mongos sa barangay Paknaan dakbayan sa Mandaue nga gibutang usab sa 3rd alarm ug nakontrolar human sa walo ka minutos.

Sa dakbayan sa Lapulapu, miabot 17 ka mga panimalay nga gama sa light materials ang nangaugdaw ug gikatahong diha magsugod sa balay nga gipanag-iya ni Joy Patalinghug.

Base sa imbestigasyon ni FO1 Mackie Salisid sa Lapulapu City Fire station short circuit sa mga wirings sa atop sa ikaduhang andana sa panimalay ni Patalinghug maoy hinungdan sa pag-ulbo sa kalayo.

Gumikan sa kahuot sa agianan naglisod pag-agi ang mga sakop sa kabomberohan maong mikatap ang kalayo sa mga kasikbit nga panimalay.

Hinoon walay gikatahong naangol atol sa maong insidente ug gibanabana nga mokabat sa P500 mil kapin ang danyos.

Ang 24 ka mga pamilyang naapektuhan sa sunog anaa kasamtangan nga gipahiluna sa  Looc Barangay Hall ug giatiman na karon sa mga sakop sa Social Welfare sa dakbayan sa Lapulapu alang sa ilang dinaliang panginahanglan ilabina sa pagkaon niini.

Sa dakbayan usab sa Mandaue matod pa ni Mandaue City Fire Marshal Chief Insp. Oscar Mayol miabot na ngadto sa walo ka panimalay ang nasunog diin upat niini ang naugdaw ug upat usab ang partially nasunog.

Atol sa imbestigasyon ni SFO2 Roy Garcia gikatahong diha magsugod sa second floor sa balay sa 70-anyos nga tigulang nga si Ponciana Ulan-ulan ang maong sunog.

Wala pa hinuon matino kung unsay sinugdanan niini apan si Ulan-ulan mibutyag nga natulog siya niadtong tungura ug nakabantay nalang nga miinit ang kwarto ug sa iyang pagmatay nagdilaab na ang balay.

Gibana-banang P430,000 ang danyos sa sunog ug walay nangaangol. – BANAT NEWS