BFAD, DOH gisaway ni Kon. Alix

CEBU - Gisaway ni Cebu City Councilor Christopher Alix ang Bureau of Food and Drugs (BFAD) ingon man ang Department of Health (DOH) tungod sa giingong walay gihimo pagsumpo sa mga pagpanglingla niadtong namaligya og mga food supplements.

Ang konsehal nga maoy chairman sa Committee on Health sa City Council miingon nga angayang mahunong na ang mga paagi nga gihimo sa mga distributor niini.

Naobserbahan ni Alix nga gipalutaw sa mga tighimo ug nagbaligya sa mga food supplements nga kini makaayo og mga sakit ug gibulak-bulakan pa og mga testimonya diha sa radyo ug telebisyon nga iyang gihulagway nga buhing bakak.

“Wa gyud makabadlong ang BFAD ug DOH ana nga nagpatoong makaayo og sakit nang mga food supplements, kadako anang bakak,” sumala ni Alix.

Basi sa pahimangno sa BFAD, ang mga food supplement walay therapeutic effect o dili makaayo sa bisan unsang matang sa sakit.

Apan ang labaw nga gikahadlukan sa konsehal mao ang iyang pagduda nga dunay mga food supplements nga gipamaligya sa merkado nga dili rehistrado sa BFAD.

Partikular nga gitumbok ni Alix mao kadtong mga food supplements nga dinhi lang sa nasud gihimo ug wala gani gibutang sa selyo niini kung asang dapita gibuhat.

Gitataw sa konsehal nga kini maoy angayang susihon sa BFAD, samtang wala pay gikatahong nabiktima sa maong matang sa baligya.

Subay niini, ang konsehal nipasidaan sa mga konsumidor ilabi na sa mga Sugbuanon nga magmatngon sa pagpalit og mga food supplements. (BANAT NEWS)