Milk ban gihangop

CEBU - Gihangop ni Cebu City Councilor Arsenio Pacaña ang pag-ban sa mga pagkaon ug gatas gikan sa China sa Bureau of Food and Drugs (BFAD).   

Ang konsehal nga maoy chairman sa Committee on Trade and Commerce sa City Council miawhag sa BFAD nga ma-pullout na sa merkado ang gipamaligyang Chinese food products aron masigurong luwas ang katawhan ilabi na sa mga Sugbuanon.

Gusto sa konsehal nga makig-alayon ang BFAD sa ubang ahensya sa gobiyerno alang sa daling pagpatuman sa kamanduan niini.

“Gikinahanglan gyud ana ang concerted effort, makig-coordinate unta ang BFAD sa DTI ilabi na gyud sa Local Government Unit nga hingtungdan,” sumala ni Pacaña.

“Kay og igo lang pud sila sa estorya, tingali og maabtan na sila og siyam-siyam, mentras wala pay nabiktima ana dinhi sa ato ba,” dugang pamahayag sa konsehal.

Ang BFAD nipatuman sa ban taliwa sa mga kabalaka kung luwas ba ang mga dairy products gikan sa China nga gipamaligya dinhi sa nasod.

Sa nasayran, upat ka mga bata didto sa China ang nakalas ug laing libuan ang nalandig sa tambalanan human makainom og gatas nga sinagulan og melamine. – BANAT NEWS