Gituohan nga usa ka 10 anyos nga bata maoy gigamit nga giya sa mga kawatan nga misulod sa balay sa usa ka architect sa San Agustin Village barangay Inayawan ning dakbayan kagahaon sa alas 3:00 sa kaadlawon.
Ang biktima mao si architect Theodore Guanzon Baguio, nga nakuhaan sa mga kawatan og P400 mil nga kantidad sa mga butang nga naglakip sa duha ka mga laptop, unom ka nagkadaiyang klase sa cellphone, video cam, digital cam ug uban pa nga didto sa entertainment room.
Matud pa sa kapolisan nga giguba ang sliding glass sa bintana sa balay pinaagi sa paggamit sa screw driver nga wala gyud mamatikdi sa mga tagbalay.
May katahap ang biktima nga gamay’ng bata ang gigamit sa mga kawatan aron makaabli sa pultahan kay nakita nila ang mga tunob sa gagmay’ng tiil sa sulod sa balay.
Misamot ang kapungot sa biktima dihang nakita nila ang yawe sa ilang balay nga gibilin didto sa gate uban sa nota nga gisuwat sa papel nga “thank you” gikan sa mga kawatan.
Ang mga elemento sa Theft and Robbery Section padayon pa karong miimbistigar sa maong kaso aron pag-ila sa mga suspetsado.