Australian Navy ship miabot

Australian Naval Ship miabot dinhi sa Sugbu alang sa usa ka “Maritime Training Activity” nga gibansagang “Lumbas 2008” nga pagahimuon uban sa mga sakop sa Philippine Navy sa Naval Forces Central sa dakbayan sa Lapulapu sud sa usa ka semana.

 Matud pa ni Capt. Robert “Bob” Davis sa Royal Australian Navy ug Commanding Officer sa Her Majesty Australian Ship kon HMAS Armidale mao kini ang ilang labing unang higayon nga nakabisita sa Sugbu.

Hinuon di kini ang labing una nilang higayon nga nisulod sa Pilipinas sanglit kaunom na sila ka higayon nakasalmot sa joint naval ug maritime exercise sa Philippine Navy dinhi.

 Matud pa ni Davis sud sa usa ka semana magbinayloay sila og mga pamaagi ug mga sistema sa training ug operasyon sa kadagatan nga gihimo sa duha ka nasud aron mapalig-on pa ang maritime territorial jurisdictions sa duha ka nasud.

Samtang gikalipay usab ni Capt. Honorio Robert Balanon sa Philippine Navy ug commander sa Navforcen ug si Capt. Nodolfo Tejada Naval Task Force 51 Commander ang pag-abot sa mga Australian Navy personnel.

 Matud pa ni Tejada gawas sa maritime joint exercise duna say himuong friendship games sama sa basketball ug volleyball batok sa isig ka miyembro sa duha ka navy.

Bisitahon usab sa mga opisyal sa HMAS Armidale si Mayor Tomas Osmeña, Centcom Commander Lt. Gen. Pedro Ike Inserto ug Police Regional Office-7 Director Chief Supt. Ronald Roderos.

 Gawas sa nasud sa Australia ang Pilipinas duna say Mutual Defense Treaty tali sa Estados Unidos ug may tinuig nga joint military exercise nga gitawag og Balikatan.