Pagbasura sa drug testing sa mga drayber gipaboran sa 2 konsehal

CEBU - Pabor ang duha ka konsehal sa siyudad sa Sugbu sa proposal ni Dangerous Drugs Board (DDB) Chairman Tito Sotto III nga wagtangon na ang mandatory drug test alang sa manglukat og driver’s license.

Ang chairman sa Committee on Transportation sa City Council nga si Konsehal Sylvan Jakosalem nidason sa pamahayag ni Sotto nga walay gamit ang mandatory drug test.

Matud ni Jakosalem nga gausik-usik lang sa kwarta sa mga molukat og lisensya ang mandatory drug test hinungdan nga kini angayan nang wagtangon.

“Para nako useless kaayo nang ipaubos sa drug test ang mga tawo before molukat og lisensya kay ang mga drug users dili gyud na sila molukat og lisensya kung naka-take og drugs, nakahibawo man pud na sila kanus-a nga dili ma-positive,” sumala sa konsehal.

Samtang ang chairman usab sa City Anti-Drug Abuse Council (CADAC) nga si Konsehal Augustus Pe Jr., giingong kaniadto pa dili pabor sa mandatory drug test.

“It does not serve the purpose kay no one in his right mind nga magpa-drug test kung siya ni-take og drugs, so, klaro kaayo nga walay gamit,” nagkanayon si Pe.

Sugyot hinoon ni Jakosalem nga kung amendahon ang balaud, mas maayong himuong mandatory ang pagpaubos sa mga driver sa drug test kung kini malambigit og aksidente sa kadalanan ug sa ubang kalapasan sa lagda sa trapiko.

Partikular nga kalapasan nga ginganlan sa konsehal mao ang overspeeding, reckless driving, ilabi na niadtong makadasmag og laing sakyanan.

“Mas maayo nga kung i-amendar, himuon lang mandatory kung madisgrasya o makadisgrasya ang driver o maka-violate og moving violations,” matud ni Jakosalem nga giuyunan usab ni Pe tungod sa iyang pagtoo nga daghan sa mga driver ang tiggamitan og ginadiling drugas.

“Kana hinoon, mas maayo na nga ang mga driver nga ma-involve og vehicular accident ug ubang kalapasan maoy ipaubos sa mandatory drug test,” niingon si Pe.

Nasayran nga gipadangat na ni Sotto ang iyang proposal ngadto sa pipila ka kongresista ug mga senador alang sa hingpit nang pag-amendar sa balaod.

Gipadayag sa DDB chairman nga sukad niadtong tuig 2003 hangtud niadtong miaging tuig, dunay 14 milyones ka mga driver nga ni-apply o ni-renew sa ilang lisensya ug nipaubos sa mandatory drug test.

Apan sa nahisgutang gidaghanon giingon si Sotto pipila lang kanila ang nasakpang nigamit og ilegal nga drugas apan walay bisan usa kanila ang napasakaan og kaso. – BANAT NEWS