Mandatory drug testing way gamit

CEBU – Hugot na ang baruganan ni Dangerous Drugs Board chairman Vicente “Tito” Sotto nga ipabasura sa hingpit ang balaod nga nagpatuman sa mandatory drug test sa mga mokuha’g drivers license.

Si Sotto kinsa bag-uhay lang niduaw dinhi sa Sugbu nipadayag nga dili epektibo ang maong balaud gumikan kay bisan usa walay napasakaan og kaso niini bisan paman nga nadiskubrehang tiggamitan sila og drogas hinungdan nga niawhag siya sa mga magbabalaod nga ibasura na kini.

Matud pa niini nga dili na epektibo ang drug testing niadtong mokuhag drivers license tungod kay tataw kaayo nga gihimo lang kini’g negosyo sa mga sakop sa Association of Drug Testing Center sa lukop nasud.

Matud pang Sotto base sa nakuha nilang data human makigtagbo sa kadagkuan sa Department of Health (DOH) nagpakita nga sukad niadtong 2003 hangtud sa 2007 dunay 14 milyones ang nikuha’g drivers license ug napaubos sa drug test.

Sa maong gidaghanon duna lay 0.06 porsiyentong nigawas nga positibo sa paggamit sa illegal nga drugas apan bisan usa kanila wala gyud mapasakai og kaso sa paglapas sa Dangerous Drugs Act tungod sa paggamit og illegal drugs.

Mas pabor si Sotto nga mas maayo nga random drug testing nalang ang ipatuman sa goberno kini aron usab masakpan gyud sa akto kadtong tiggamitan sa illegal nga drugas ug mapasakaan og kaso.

Gawas pa ang drug test nakahasol sa mga nanguha og lisensya apan gihapon nga mahulagway nga way kapuslanan ug pag-usik-usik lang sa kwarta ingon man panahon.

Matud pa niini kadto lang mga drug testing centers maoy mabulahan gumikan kay adunay mga drug addict nga mokuha’g lisensya og makalusot human mobayad sa suborno. – BANAT NEWS