Gatas para sa bata dinhi ipasusi

CEBU – Nabalaka karon si Cebu City Councilor Arsenio Pacaña sa mga gatas nga gipamaligya dinhi sa dakbayan nga gikan sa nasud sa China gumikan sa kontrobersiya sa pipila ka Chinese milk products nga nasagolan og melamine nga makadaut sa panglawas sa kabataan.

Ang melamine usa ka organic compound nga sagad sagolan og formaldehyde (formalin) aron mumugna og melamine resin nga usa ka synthetic polymer ug fire resistant nga moagwanta sa kainit sa panahon aron magamit sa paghimo og mga plastic materials.

Matud ni Pacaña nga iyang susihon sa Department of Trade and Industry (DTI) kung kini duna na bay gihimong lakang ug moawhag sa maong buhatan nga mopakatap og mga operatiba ang DTI diha sa mga tindahan nga mosusi sa mga infant formula kung wala bay melamine.

“Magpakisayod ko sa DTI kung ila na ba na nga gisusi kay this should be pulled-out, peligro kaayo na,” sumala ni Pacaña kinsa maoy chairman sa Committee on Trade and Commerce sa City Council.

Aron masigurong luwas ang kabataan dinhi sa dakbayan gikan sa makadaut nga kemikal nga gisagol sa infant formula.

“Ang akong tambag sa mga ginikanan nga molikay na lang gyud pagpalit og mga Chinese milk products, that’s the best way we have,” matod ni Pacaña.

Nasayran nga ang Department of Health (DOH) nipagawas na usab og health advisory sa publiko nga magmabinantayon pagpalit og infant formula ilabi na niadtong gikan sa maong nasud ug kadtong di brande ug gi-retail. 

Didto sa China, ang San Lu Milk gikuha na gikan sa merkado human mamatay ang upat ka bata samtang kapin sa 6 mil ang nalandig sa tambalanan human makainom sa nahisgutang gatas nga napamatud-an sa usa ka pakisusi nga dunay sagol nga melamine. – BANAT NEWS