Anak ni Mayor Socrates Fernandez sa Talisay City nga si Joavan Fernandez hatagan og napulo ka adlaw sa City Prosecutors Office sa pagsang-at og motion for reconsideration kun ugaling isang-at na ngadto sa korte ang kasong pagpanignit ug pagpangulata sa mag-agaw nga gipasangil kaniya.
Matud pang Talisay City Prosecutor Marshall Rubia gisumiti na kagahapon ni Fiscal Jenelyn Forrosuelo kaniya ang resolusyon sa imbestigasyon sa kaso ni Joavan Fernandez.
Si Forrosuelo kinsa Associate Attorney II sa Talisay City prosecutor’s office ang gisangunan sa kasong serious illegal detention, grave threats ug physical injuries nga giduso sa mag-agaw'ng Osbert ug Winston Abellana batok kang Joavan.
Wala hinuon mobutyag Rubia kung unsay unod sa resolusyon ni Forrosuelo apan kini mibutyag nga i-review ug i-evaluate pa niya ang resolusyon.
Ug kung maaprubahan na ang resolusyon padalhan niya og kopya niini ang mga biktima ug ang suspetsado una pa ipasa ngadto sa korte.
Sila si Benedict Gabasa, Mark Perez, Teodoro Ligaray ug laing duha nga menor de edad kinsa giingong lakip sa gipasanginlang nangulata sa mag-agaw'ng Abellana nagtingkagol na sa Talisay City Jail.
Ang upat dunay buwag nga kasong gipasaka may kalambigitan gihapon sa maong insidente ug napaubos na sila sa inquest proceedings.
Samtang duha ka menor nga suspek ipaubos pa sa review sa City Social Welfare.
Kahinumduman nga dihang ang mga polis miresponde sa nahisgutang hitabo wala nila malakip sa pagsikop si Joavan kay giingong wala na kini diha sa ilang balay sa Friendly Homes, sa sitio Mansueto, barangay Bulacao, Talisay dihang naabot na ang mga polis.
Sa laing bahin, gisalikway na sa mga awtoridad ug gihunong ang imbestigasyon kabahin sa pasangil nga nakit-ang nagdala og armas si Joavan diha sa motor pool gumikan kay walay nibarog nga testigo.
Sa milabay'ng mga semana si Joavan giingong nakit-ang nagdala og pusil diha sa motor pool ug nangita kini sa usa ka kawani nga iyang giselosan.
Apan kagahapon sa buntag si Talisay City Administrator Richel Bacaltos mihimakak niini base usab sa pamahayag sa mga kawani sa motor pool pinanguluhan ni Loloy Fernandez nga igsuon sa mayor dihang sila gipatawag niadtong Lunes aron mopatim-aw sa maong pasangil.
Ang city administrator nagkanayon nga posibleng nadudahan lang ang lihok ni Joavan sa pag-adto niini sa maong departamento nga may gipangitang tawo.
Gibutyag ni Bacaltos nga hangtud karon si Joavan kawani gihapon kini sa city isip usa ka job order ubos siya sa buhatan sa mayor ug giingong magdepende ra ang trabaho niini sa kung unsay sugo sa mayor kaniya.