Suspek pagtulis ug pagpusil sa usa ka taxi driver nadakpan ug gipasakaan og kasong robbery with frustrated homicide sa kapolisan sa dakbayan sa Mandaue human kini madakpi diha sa gawas nga bahin sa Land Transportation Office sa Mandaue.
Ang suspek kinsa giingong sakop sa Alpha Kappa Rho ug fixer diha sa LTO-Mandaue giilang si Emmanuel Cuse, 24, residente sa barangay Cambaro sa Mandaue ug positibong giila sa biktima niining si Alberto Araquel, 43, driver sa Peace Taxi.
Sa report sa Balitang Bisdak kagahapon gitumbok nga kauban ni Arestotle Aves si Cuse
Si PO3 Gregorio Cabesares nga nahinabi sa Banat News nagkanayon nga nagtuo silang nalambigit usab si Cuse sa ubang pagpanulis diha sa dakbayan gumikan kay sagad sa mga paghulagway sa mga nabiktima kaniadto mitukma usab kaniya.
Si Araquel nga nagmaneho sa taxi ang gitulis sa miaging Miyerkules sa kaadlawon diha sa dalan A.C. Cortes Avenue sa barangay Cambaro dihang gihunongan niini sa pagtuo nga pasahero ang suspetsado nga nag-atang sa maong dapit.
Apan imbes nga mosakay kalit siyang gitionan og armas sa suspetsado ug mideklarar og tulis, dihang gitunol sa biktima ang P200 nga kwarta kalit siyang gipusil sa suspek ug nagdali og sibat palayo.
Si Cabesares miingon nga ilang gipaabot ang uban pa nga nga biktima sa pagpanulis sa maong dapit alang sa pag-ila kang Cuse aron ang dugang kaso batok niini hingpit usab nilang ikapasaka.