Towing company sa CITOM hayan pailisan ni Tom

CEBU - `Nagplano si Mayor Tomas Osmeña nga ilisan ang towing company nga gikontrata sa siyudad sa Sugbu pagguyod sa mga sakyanan nga gipataka lang og parking sa kadalanan sa dakbayan.

Kini tungod usab sa mga reklamo nga nadawat sa mayor sa pagpataka lang usab niini og panakop ug pagpangguyod sa towing company bisan pa man naa diha sa atubangan ang tag-iya sa sakyanan.

Ang eksklusibong towing company nga gikontrata sa siyudad alang sa maong tahas makakolekta og P1,500, P1,800, P2,00 ug P2400 ang bayran unya sa tag-iya depende sa sakyanan nga magguyod sa nahisgutang towing services.

Apan gipadayag ni Citom executive director Arnel Tancinco nga bag-o lang napirmahan ang kontrata tali sa siyudad ug towing company.

Ang lima ka tuig nga kontrata giingong unya pa matapos sa tuig 2013, apan kini mahimo hinoong makanselar kung seryosohon sa mayor ang pag-ilis niini.

Labing daghan nga nagguyod mao ang mga motorsiklo nga gipataka lang og parking sa kadalanan sa dakbayan diin mokapin na sa 5,359 ka mga motorsiklo ang gikarga sa maong towing company sulod sa miaging 18 ka buwan.

Alang kang Osmeña nga taas ra usab ang gipahamtang nga multa sa mga motorsiklo nga magguyod ug buot niya kining maus-usan.

Ang chairman sa Committee on Transportation sa City Council nga si Konsehal Sylvan Jack Jakosalem maoy gitahasan sa mayor paghimo og kausaban.

“Maybe you can reduce it but not to the level of affordability,” nagkanayon ang mayor ngadto sa konsehal.

Ang pag-usab unya sa ordinansa giingon ni Jakosalem nga maoy usa sa ilang tukion atol sa Citom board meeting karong adlawa.

Samtang gitakda usab nga mopasabot si Tancinco ngadto sa mayor karong adlawa labot gihapon sa maong kontrobersiya. (BANAT)