CEBU - Nabungkag ang lawas ug nagusbat ang nawong sa usa ka mananagat nga giingong nabuthan og dinamita atol sa pagpangisda diha sa kadagatan sa barangay Tacop lungsod sa San Remegio niadtong Martes sa alas 12:00 sa udto.
Ang biktima mao si Nicandro Jogan Piañar, 35, molupyo sa nahisgutang lugar ug pagpanagat ang trabaho.
Matud ni SPO4 Primo Duazo sa San Remegio Police dihang nahinabi sa Banat News nagkuyog ang biktima ug iyang asawa nga si Jenna Piañar ug 7-anyos nga batang sinagop luwan sa sakayan.
Matud sa pipila ka mga mananagat nga nahinabi sa kapulisan dihang nakasigpat ang biktima og duot sa isda dali kining nikuha sa botelyang dinamita ug gidagkotan.
Apan wala pa gani malabay sa biktima ang maong dinamita aksidente kining nibuto niresulta sa pagkabungkag sa lawas niini ug nagusbat usab ang iyang nawong.
Hinuon wala ma-unsa ang asawa ug anak niini nga naghupo sa sakayan dihang gidagkotan ug aksidenteng nibuto, apan gumikan sa impact nalunod usab ang sakayan.
Ang laing mananagat nga nangisda usab niadtong higayuna mao nay ni-rescue sa manag-inahan nga nagpalutaw-lutaw nalang sa dagat.
Matud ni Duazo gisuwayan unta pagtabang ang biktima apan nasuta nga dead on the spot kini hinungdan nga wala nalang kini dad-a pa sa tambalanan.
Nahitabo ang maong insidente pipila ka oras human mapisat ang usa ka 22-anyos nga si Apolonio Andales human kini madat-ogi sa natipak nga dakung bato sa dagat nga gituohang tungod sa pagpabuto usab og dinamita kagahapon sa buntag diha sa sitio Sagporon, barangay Subabasbas dakbayan sa Lapulapu. (BANAT)