CEBU - Manginlabot na ang Dangerous Drug Boards (DDB) kabahin sa giingong pagpalusot og iligal nga drogas sa mga jailguards diha sa Cebu City Jail diin usa sa tulo ka testigos ang gisuwayan og patay diha mismo atubangan sa maong bilanggoan.
Si DDB Undersecretary Atty. Paul Clarence Oaminal sa pakighinabi sa Banat News nagkanayon nga ilang pakigkitaan ang mga kadagkoan sa Bureau of Jail Management and Penology (BJMP-7) ug pangayoan og report labot sa pagpusil sa testigos batok sa upat ka jailguards.
Ang maong mga jailguards nga girelibuhan na sa pwesto maoy gitumbok nga responsable sa pagpalusot og iligal nga drogas ug uban pang matang sa kontrabando diha sa maong bilanggoan.
Karong Biyernes makigtagbo si Oaminal kang DILG-7 Undersecretary Lito Ruiz aron hisgutan ang isyu sanglit ang BJMP ilawom sa superbisyon sa DILG.
Lakip sa ilang tukion ang isyu sa pagpusil kang Taboada kinsa dakog ikatabang sa kaso batok sa mga jailguards.
Iya usab unyang dalhon ang maong isyu atol sa ilang tigom sa DDB karong sunod bulan didto sa kauluhan aron mapadali ang pagtaral sa mga jailguards sa hustisya.
Samtang ang mga imbestigador sa kapulisan sa dakbayan sa Sugbu niangkon nga nagka-problema sila pagsubay sa mga suspek nga mipusil kang Taboada gumikan kay midumili kini pagkooperar kanila.
Si Sr. Insp. Mario Monilar ang hepe sa Homicide Section mitug-an nga wala pa mohatag og klarong katin-awan si Taboada sa nahitabo kaniya aron malili kung unsay motibo sa pagpusil kaniya.
Apan sa imbestigasyon nasuta gikan sa mga testigos nga nadunggan pa nila si Taboada nga nangayo’g pasaylo sa mga suspek apan sa dayon niining talikod gipusil kini sa bukobuko. – BANAT NEWS