Jagobiao gihimong hideout sa tulisan

CEBU – Ang barangay Jagobiao sa dakbayan sa Mandaue maoy gituohan karon sa kapolisan nga gihimong imbudo sa mga tulisan nga magsakay og motorsiklo nga manglabni og manulis sa dakbayan sa Mandaue, Consolacion ug molabyog ngadto sa silingang kalungsoran ug dakbayan.

Si PO3 Nolberto Cejas sa Consolacion Police Station nga nahinabi sa Banat News miingon nga wala pa mahurot ang nag-imbudo nga mga tulisan sa barangay Jagobiao bisan kun daghan na ang ilang nadakpan.

Ang dugang nga mga tulisan nga ilang nadakpan nga nag-imbudo gihapon sa maong lugar mao ang tulo ka mga suspetsado nga nagtulis ug namusil sa negosyante nga si Felomino Lumapas kinsa kuyog sa iyang asawa nga si Gabriela kinsa gikan nga nagsira sa ilang botika alas 10 pasado ang takna sa gabii.

Ang tulo nga nadakpan mao sila si Edrel Puno, Ivy Abasolo ug Pio Velasquez Tahong kinsa positibo nga giila kagahapon ni Felomino kinsa mibisita kagahapon sa CIDG 7.

Ang dinakpan nga si Tahong ang unang nagtingkagol sa Consolacion Police Station apan gidala kini sa Criminal Investigation and Detection Group (CIDG) 7 alang sa dugang pa nilang pagsukit-sukit.

Si PO3 Melvin Pelayo sa kapolisan sa Presinto 3 sa Basak Police Station sa dakbayan sa Mandaue nga nahinabi sa Banat News miingon nga kanunay nilang gi-roving ang barangay Jagobiao apan ilang namatikdan nga manago usab ang maong mga tulisan.

Dugang pa ni Pelayo, si PO3 Carlos Zapanta ang ilang gidestino sa barangay Labogon alang sa pag-monitor sa mga ilegal nga kalihukan na usab niini ang barangay Labogon sa dakbayan sa Mandaue. – BANAT NEWS