CEBU - Nadakpan niadtong Biyernes sa hapon ang mitulis ug mipusil sa usa ka negosyante’g Botica sa lungsod sa Consolacion sa miaging Domingo sa gabii.
Ang nasikop sa hiniusang puwersa sa kapolisan sa Consolacion ug sa mga sakop sa Criminal Investigation and Detection Group (CIDG)7 mao si Pio Velasquez Tajong, Edrel Puno ug Ivy Abasolo , pulos hingkod ug nagpuyo sa Upper Jagobiao, Mandaue City.
Sa tulo, si Puno maoy naangol dihang misuway kini og eskapo sa pagkamatngon niyang gilibotan na sa kapolisan ang balay nga ilang gipuy-an.
Ang tulo maoy suspetsado sa pagtulis kang Felomino Lumapas uban sa asawa niining si Gabriela Pua Lumapas niadtong Domingo sa gabii dihang manira na unta sila sa ilang botica nga Bing’s Pharmacy sulod sa bag-ong merkado publiko sa Consolacion kay mamauli na.
Apan imbes mauli sa ilang balay, didto modantol sa hospital ang bana nga si Felomino dihang nasabak kini sa dughan sa bala sa armas de fuego sa mga tulisan.
Nasakmit sa maong mga suspetsado ang bag ni Gabriela nga may sulod nga P70,000.
Dihang nasayod si Kongresista Rolando Poua sa Siquijor, kinsa igsoon ni Gabriela, mihangyo dayon kini sa mga tinugyanan sa CIDG Manila nga ipasulbad dayon ang kaso.
Gumikan niini milihok dayon ang CIDG ug nakigkumboya dayon kini sa kapolisan sa Consolacion aron pagsulbad sa maong kaso.
Ang kapolisan sa Consolacion kinsa daan nang nakapaniid sa presensya sa mga tulisan diha sa ilang lugar, dali ra kaayong nakahimo og lakang.
Si PO1 Ryan Rey Heyrosa sa Consolacion Police Station mibutyag sa Banat News nga ang una nilang nadakpan mao si Pio Velasquez Tajong.
Nasakmit nga mga ebidensiya atol sa iyang pagkasikop mao ang duha ka shoulder bag sa babaye nga ilang gitulis sa barangay Mabolo sa dakbayan sa Sugbu.
Dugang nasakmit gikan kaniya ang pula nga XRM motorcycle nga walay plate number, ug usa ka kalibre .357 nga armas nga adunay mga buhing bala ug kabhang niini.
Matud pa ni Heyrosa nga kauban nila ang ang kapolisan sa (CIDG) 7 nga gigiyahan ni Tajong, gironda nila ang balay nga gipuy-an ni Puno ug Abasolo ug milampos sila sa pagsikop niini. Banat News