Giyak-an og dunggab sa carwasher

CEBU -Usa ka taxi driver ang napalgang patay nga naputos sa samad dinunggaban sa nagkadaiyang bahin sa lawas diha sa RP Corominas Compound Garage, C. Padilla St., barangay Duljo Fatima (sulod sa workers bunkhouse) ning dakbayan.

Ang namatay giila sa kapulisan nga si Julius Pelarca, 38, residente sa Daclan Compound, Tres de Abril St., barangay Labangon ning dakbayan, samtang ang suspetsado usa ka ginganlan lang og “Kulot” hingkod ang panuigon ug car washer sa nahisgutang garahian ug lumad nga taga Cordova.

Usa sa mga saksing mekaniko nga taga dakbayan sa Toledo nitug-an sa mga imbestigador sa kapulisan nga natulog siya niadtong higayuna sulod sa bunkhouse dihang iyang nadungog ang tingog sa biktima nga nangayog panabang.

Daling gisusi niini ang dapit ug diha-diha gilayon iyang nakita ang suspetsado nga nagpatong na sa biktima dala ang usa ka kutsilyo nga nagsige’g dunggab sa biktima.

Sa kahadlok dali siyang migawas ug nanawag og polis apan daling nisibat ang suspetsado una pa makaabot ang mga polis.

Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office laing saksi nga kauban sa trabaho sa biktima nibutyag nga ang panagbangi sa duha sa miaging gabii dihang ang biktima hubog ug nanugo sa suspetsado sa pagpapalit og beer gawas sa compound.

Apan ang suspetsado wala magtagad gumikan kay daghan pa siyang mga sakyanan nga gihugasan, nasuko ang biktima ug gitamparos makadaghang higayon ang nawong sa suspetsado. - Banat News