CEBU - Natuhog sa gunting ang ulo sa usa ka tawo dihang giluba kini sa iyang silingan sa barangay Labogon, dakbayan sa Mandaue sa miaging gabii.
Ang biktima mao si Selvino Catingan, 30, minyo nga taga dalan P.C. Suico, barangay Tabok, dakbayan sa Mandaue ug ang midunggab kaniya mao si Edgardo Amabao, 33, minyo nga iyang silingan.
Si SPO1 Edgardo Pasaylo nga nahinabi sa Banat News miingon nga ang pagpanunggab nahitabo human sa mainitong lalis tali sa biktima ug sa suspek.
Sa tantong panaglalis nahutdan sa katarungan ang suspek ug gumikan sa hilabihang kapungot niini mikuha og gunting nga maoy iyang giduslak sa biktima.
Matud pa ni SPO1 Pasaylo nga gipuntariya sa suspek ang dughan sa biktima apan gumikan sa kaabtik nga mihupo sa naulahi, bagolbagol, niini maoy natusak sa gunting.
Giusban pa gyud og hansak sa suspek ang biktima apan nakapanagang ang naulahi ug nagdinumogay silang duha hangtod nga naabtan sa mga barangay tanod.
Miabot usab ang kapolisan nga maoy nakasikop dayon sa suspetsado.
Gidala ang biktima sa Mandaue City District Hospital apan gibalhin kini sa Vicente Sotto Memorial Medical Center sa dakbayan sa Sugbu. – Banat News