CEBU - Naghiusa karon ang kapolisan sa Consolacion ug ang mga sakop sa Criminal Investigation and Detection Group (CIDG) Central Office sa Manila alang sa dinaliang kasulbaran sa nahitabong tulis sa lungsod sa Consolacion niadtong Lunes sa gabii nga mibiktima sa usa ka negosyante.
Matud pa ni SPO1 Ricardo Ermac, sa Consolacion Police Station nga ang lakang sa CIDG Manila, nahimo dihang milihok si Kongresista Rolando Pua sa Siquijor, tungod kay si Gabriela Lumapas ang asawa ni Felomino Lumapas kinsa napusilan sa mga tulisan, igsoon man ni Pua.
Si Ermac mitug-an sa Banat News nga si Kongresista Pua nangayo og panabang sa CIDG Manila aron masulbad dayon ang maong kaso.
Sa bahin sa kapolisan sa Consolacion, gipasalig nila nga hingpit silang makighiusa sa maong lakang ug nalipay sila nga may lig-on silang katabang aron mailhan kadtong duha ka tawo nga mitulis sa magtiayong Lumapas.
Nasayran usab gikan kang Ermac nga anaay ilado kaayong mga tulisan sa ilang silingang lugar nga malagmit nalambigit sa maong tulis ug gani pipila kanila ang nabalhog na karon sa prisohan.
Sa nasayran nga paingon na sa pagpamauli ang magtiayong Lumapas human manirado sa ilang botika nga nahimutang sa bag-ong merkado sa Consolacion dihang gitulis kini sa duha ka armadong lalake nga nagsakay og motorsiklo.
Misukol si Felomino sa mga tulisan ug nakig-inilogay sa bag nga giilog niini gikan sa iyang asawa nga may sulod nga P70,000.
Wala makalahutay si Felimino sa binunlotay sa bag dihang gipusil siya sa dughan sa usa sa mga tulisan.
Gibiyaan ang biktima nga nalukapa sa yuta ug misirit dayon ang maong mga tulisan dala ang bag sa biktima.
Samtang ang biktima gidali paghatod ngadto sa Perpetual Soccour Hospital sa dakbayan sa Sugbo.
Hangtod karon padayon pang gipanid-an sa kapolisan sa Consolacion ang maong mga tulisan.