CEBU - Walay suweldo ang 25 ka mga kaswal nga kawani sa city hall sa dakbayan sa Mandaue kay gipanangtang ang mga ngalan niini sa Supplemental Budget Number 1 nga giaprobahan sa konseho sa maong dakbayan.
Si Konsehal Emiliano Rosal nga maoy chairman sa committee on budget and appropriation sa konseho sa maong dakbayan miingon nga ilang gitangtang ang mga ngalan sa 25 ka kaswal gikan sa 1,784 ka mga “job order” nga mga kawani.
Kini sa dihang nadiskitaan nila nga tulo niini may ngalan usab sa ubang departamento, adunay 11 nga nabalhin na ngadto sa laing buhatan sa kagamhanan, samtang may pito nga gidestino sa Mandaue City College ubos sa pagdumala ni Dr. Susana Cabahug.
Matud pa ni Rosal nga maayo nalang kay ilang gitutokan ang pagsusi sa maong ngalan, kay kun wala pa, delikado kaayo nga magduble ang suweldo sa maong mga kawani nga kun dili madiskubrehan, mahimong laing mga kamot ang mokubra sa maong suhol, matud niya. - BANAT