CEBU - Nagkawil-kawil ang liog sa usa ka mananggiti dihang gilipot sa laing mananggiti ug giabis og sanggot ang liog samtang naglingkod nga nagtan-aw og duwa nga volleyball sa barangay El Pardo lungsod sa Boljoon niadtong Sabado sa alas 2:30 sa hapon atubangan sa iyang duha ka mga anak lalaki nga nagpangidaron pa og 9 ug 16-anyos.
Ang biktima nga namatay diha-diha mao si Antonio Sestoso, 41, nagpuyo sa nahisgutang lugar human kini sanggota sa silingang si Nardito Bentazal De Rama, 38, usa usab ka mananggiti.
Matud ni SPO4 Emmanuel Villareal imbestigador sa Boljoon Police dihang nahinabi sa Banat News naglingkod ang biktima uban sa duha ka anak dihang gilipot sa suspek ug kalit giabis ang liog ginamit ang sanggot.
Gikatahong nilugnot kini hinungdan nga ang tuong aping ang nasamad apan una pa kini makaklaro sa nahitabo giusban kini og abis sa suspek ug nianang higayuna diha na dapit sa liog ug tungod sa kahait sa sanggot dali kaayong natabas ang liog sa biktima apil ang ubol-ubol.
Ang suspek nisibat unta apan nasikop ra usab dayon kini sa nag-respondeng sila si SPO4 Cristino Uraca ug mga kaubanan ug nakuha gikan kaniya ang sanggot nga nagkadugo.
Subay sa gihimong pagsukit sukit sa kapulisan ngadto sa suspek gitug-an niini nga iyahang giunhan ang biktima human siya makadungog og tabi-tabi nga nanganti kining siya patyon sa higayun nga sila magkakita. - BANAT