CEBU - Gihulagway ni Cebu City Councilor Christopher Alix ang balaudnon nga Medical Gift Giving Ban Act nga gipalabang ni senadora Miriam Defensor Santiago nga walay kapuslanan.
Ubos sa Senate Bill 2584 ni Santiago, mahimong makamulta ug mabilanggo ang mga doktor nga modawat og regalo gikan sa mga pharmaceutical company.
Nahuna-hunaan ni Santiago ang pagpalabang sa maong balaudnon human niya hisayri nga dunay mga doktor nga mudawat og mga regalo ilabi na sa kuwarta, pagkaon, ug uban pa, gikan sa tighimo og mga tambal.
Gihulagway kini sa senadora nga “conflict of interest” tungod kay dili na man unya kabalibad, o mapugos ang mga doktor pagresita ngadto sa ilang mga pasyente sa tambal nga hinimo sa nahisgutang mga kompanya.
Apan alang kang Konsehal Alix nga usa usab ka doktor, wala na kinahanglana ang nahisgutang balaudnon ni Santiago.
Kini tungod kay ang pagdawat og regalo ilabi na gikan sa mga pharmaceutical company kabahin na kini sa mga kalapasan nga anaa sa Medical Ethics.
Ang konsehal nga maoy chairman sa Committee on Health sa City Council miingon nga labaw nang gidili ang pagdawat og bisan unsang regalo kung ang doktor usa ka empleyado sa gobiyerno.
Gawas niini, nakita usab ni Alix nga lisod ikapatuman ang maong proposal kung mahingpit nang balaod.
“Dili man gyud nato malimod nga dunay mga doktor nga modawat og regalo, tagaan pa gani nang uban og plane ticket paingon sa gawas, pero kinsa may mopatuman unya sa balaod? Unsaon man nila na pagpatuman? Masusama lang gihapon na sa ubang balaod nga walay gamit, useless ba,” sumala ni Alix.
Sa nahisgutang balaudnon ni Santiago, mahimong mamultahan ang mga malapasong doktor og P1,000 hangtud sa P10,000 o mabilanggo og duha ka buwan hangtud na sa usa ka tuig.
Wala hinuon idili sa Senate Bill 2584 ang pagdawat sa mga doktor og mga sample gikan sa mga drug manufacturer o drug distributor. – BANAT