12 ka kawani sa MCWD pasar sa eksamin

CEBU – Dose (12) sa 17 ka mga kawani sa Metropolitan Cebu Water District (MCWD) nga nipaubos sa Alternative Learning System kon ALS Accreditation and Equivalency Test niadtong miaging Hunyo 12 ang nakapasar sa nahisgutang pasulit.Ang maong mga kawani giingong mahimo nga mopadayon sa ilang pagtungha sa kolehiyo tungod sa taas nga rating nga ilang nakuha sa eksaminasyon bisan sila wala makatapos sa elementarya ug sekondarya.

Ang mga successful examinees nga nakakuha og kapin sa 100 nga score, naglakip nila ni Roger Paradero, Ramon Caballes, Gabiana Walter, Romeo Dable, Mario Candilanza, Felix Gingoyon, Cesar Pasaol, Elmer Abad, Lisendro Asterio, Leonizarte Cabingatan, Hernani Ecarma, ug Johannes Nuñez.

Ang nahisgutang mga empleyado sa MCWD kabahin lang sa 8,485 nga nakapasar sa maong eksaminasyon sa tibook nasod gikan sa 30,679 nga mikuha niini ug mokapin sa usa ka libo usab niini nagagikan dinhi sa siyudad.

Ang Department of Education (Deped-7) wala pa mopagawas og kompletong listahan sa mga nakapasar apan giingong kadaghanan niini mga Sugbuanon.

Subay niini, ang chairman sa Committee on Education sa City Council nga si konsehal Gerry Carillo miawhag sa mga Sugbuanon nga mopa-enroll sa ALS program nga gipasiugdahan sa siyudad ug sa DepEd aron makabaton usab og diploma kung magmalampuson sa ipahigayong eksaminasyon.

Walay bayad ang maong programa ug ang bugtong buhaton sa mga interesado mao lang ang pagpakisayod sa buhatan sa konsehal diha sa City Hall.

Matud ni Carillo nga ang ilang tumong sa nahisgutang programa mao ang pagsiguro nga makahupot og diploma ang matag mulopyo sa siyudad.

Gani gipahibawo sa konsehal nga gatosan ka mga kawani sa City Hall ang gipaubos karon sa maong programa.

Nasayran sa Banat News nga moabot sa 236 ka mga empleyado sa balay dakbayan ang gitakdang mopaubos sa nahisgotang pasulit karong Oktubre 12.