Sunog sa Sambag 1 'tinuyo'

CEBU - Arson maoy gitutukan sa kabomberuhan sa dakbayan sa Sugbu sa nahitabong sunog mga alas 11:30 kagahapon sa buntag sa Rañeses Apartment nga nahimutang sa dalan P. del Rosario St., barangay Sambag I ning dakbayan.

Si Cebu City Fire Marshall Ismael Codilla nagkanayon nga base sa ilang initial nga imbestigasyon duna silay nakuhang mga ebidensya nga nisibo sa arson ang motibo tungod kay dunay bahin sa nasunog nga balay sa ikaduhang andana ang nanimahong kerosene.

Matud pa niini nga ila na karong gipadala ang samples sa abo ug ubang debris sa sunog ngadto sa buhatan sa National Bureau of Investigation (NBI-7) aron mahiling sa mga eksperto.

Gibutyag niini nga usa ka Maricar Sioco, usa sa mga nag-abang sa door 2 sa maong apartment ug nanawat usab og mga boarders ang nitug-an nga ang iyang boarder nga si Marvin Abingosa maoy gituohang nisunog sa kwarto sa ikaduhang andana.

Sumala pa niini nga nigawas sa ilang imbestigasyon duha ngadto na sa tulo ka minutos dihang nibiya si Abingosa niulbo ang kalayo sa aparador diin puno sa sinina sa lawak nga giabangan niini. Matud pa ni Sioco sa mga imbestigador nga nagkalalis sila ni Abingosa dihang iyang gipaninglan sa bayad sa giabangang lawak sukad sila niabang niini pito na ka adlaw ang nakalabay.

Apan si Abingosa gikatahong nisaad ra nga mobalik apan wala na mopakita pa uban sa usa ka babayeng kauban niini sa kwarto nga ginganlan lang og Ann-Ann.

Si SFO2 Alicasim Espinola, fire investigator sa maong kaso nga gihinabi sa Banat News mibutyag nga nanimaho gyung gas kon kerosene sa lawak diin gikan ang sunog.

Gipangita na karon sa BFP si Abingosa aron makapatim-aw sa iyang habig kalabot sa nahitabo.

Mokabat sa P350 mil ang inisyal nga danyos sa maong sunog nga giisa sa second alarm ug nakontrolar sulod lang sa kinse minutos.

Upat ka mga molupyo sa upat ka apartment nga gipuy-an nila ni Maricar Sioco, Ignacio Navalez, Adeth Villaroel ug Lemuel Melgarijo maoy nangaugdaw.