Pito ka mga patay'ng lawas sa mga crew ug co-pilot sa nahagsang C-130 sa Samal Island sa Davao miabot na dinhi sa Sugbu kagahapon ug gisugat kini pinaagi sa usa ka “Heroes Welcome” mga 1:40 pm sa Mactan Benito Ebuen Air Base.
Sa siyam ka mga sakop sa PAF sa nahagsang C-130 pito lamang ang gidala dinhi sa Sugbu ug ang nagpabilin mao ang lawas sa piloting si Major Manuel Zambrano nga lumad sa Nueva Ecija ug SSgt. John Areola lumad sa Villamor Air Base.
Matud pa ni 1Lt. Ramil Daet uban sa nangabot luwan sa usa ka PAF Fokker plane gikan sa Villamor Air Base sa Pasay City ang mga kabanay sa mga biktima.
Misugat ang mga nahibiling kabanay sa mga sundalong sila si TSgt. Enrique Lobregas, SSgt. Aldren Illustrisimo, SSgt. Felix Pedro Patriarca, SSgt. Patricio Claur, SSgt. Petronillo Fernandez ug SSgt. Gary Diñoso.
Daw susama sa mga sundalong madaugon gikan sa gubat, sila gisugat sa ilang mga kaubanan sa 220th Airlift Wing ug honor guards sa PAF. Matod pa ni Daet ang PIO sa 220th AW posibleng wala nay DNA testing nga pagahimoon alang sa pagsusi kung ang mga body parts nga anaa gisud sa lungon gumikan kay nakadawat na ang mga kabanay sa nahitabo kanila.
Mihatag usab og panalangin ang mga kaparian sa tulo ka mga sanga sa militar nga gipangulohan ni Bishop Leopoldo Tumulak ang ilang Military Bishop ug si Capt. Adan Rose sa MBEAB chaplain, Capt. Pios Alejo sa PAF/VAB, Capt. Paul de Guzman sa 53 Engineering Brigade Phil Army ug Capt, Manolo Mendez Chaplain sa Phil. Navy diin pagkahuman gidala kini sa simbahan sa MBEAB alang sa ilang haya.
Samtang si Capt. de Dios posibleng isakay kini sa abyon padulong ngadto sa iyang yutang natawhan sa Catarman sa lalawigan sa Samar.
Si Jacklyn Areola, asawa ni SSgt. Areola mipadayag nga tulo ra ka adlaw ihaya si Areola sa ilang panimalay sa Villamor Air Base ug sa Biyernes dad-on kini sa dakbayan sa Lapulapu.