Si Kongresista Benhur Salimbangon ang nagpakita sa iyang pagpangga sa mga lungsod ug siyudad sa kuwatro distrito bisan og sa habig sa oposisyon ang mga mayor niini.
Si Salimbangon dunay mokabat P40 milyones nga proyektong inprastraktura alang ning tuiga base sa listahan sa Cebu First Engineering Office sa Department of Public Works and Highways-7.
Kini naglakip sa kadalanan, tunghaan, patubig ug mga multi-purpose buildings sa kalungsoran ug kabarangayan.
Sa siyam ka mga mayor sa kuwatro distrito, tulo lang niini ang anaa sa habig ni Salimbangon samtang ang kadaghanan anaa sa habig sa mga Martinez nga maoy nakadawat sa daghang proyekto karong tuiga.
Ang kaalyado ni Salimbangon mao sila si Mayor Sun Shimura sa Daanbantayan, Geralyn Escario-Cañeres sa Bantayan ug Salvador dela Fuentes sa Madridejos.
Sa pundok sa mga Martinez mao sila si Mayor Celestino Martinez Jr. sa dakbayan sa Bogo, Casiano Gerona sa Tabuelan, Marinao Martinez sa San Remegio, Ricardo Ramirez sa Medellin, Jennifer Ilustrisimo sa Santa Fe ug Eusebio Dungog Sr. sa Tabogon.
Ang Tabuelan dunay P7milyones alang sa pagpaayo sa kadalanan ug P1 milyon sa pagtukod sa lawak saringan.
Ang San Remegio dunay P4 milyones alang sa kadalanan ug P1.8 milyones alang sa tunghaan ug P400 mil sa patubig.
Ang Santa Fe dunay P11milyones sa kadalanan ug P1.3 milyones sa tunghaan.
Ang dakbayan sa Bogo dunay P1 milyon ka pesos alang sa tunghaan samtang ang Tabogon dunay P.5 milyon alang sa tunghaan, P300 mil alang sa patubig ug P.5 milyon alang sa pagtukod og multi-purpose building.
Sa niaging tuig, nakadawat usab ang mga kaalyado ni Salimbangon og mga proyekto gikan sa nahibilin nga Priority Development Assistance Fund sa iyang gihulipan nga si kanhi Kongresista Clavel Asas-Martinez.
Ang matag Kongresista dunay P70 milyones nga PDAF matag tuig nga maoy gamiton sa pagpanghatag og mga proyekto ngadto sa ilang distrito.