Kritikal ang kahimtang sa usa ka tawo kinsa gipusil sa iyang kontra nga drayber sa habal-habal didto sa Villa Angelina, sitio Canlingo, barangay Sabang, Danao City niadtong miaging gabii.
Ang biktima mao si Esmael Baranggan, 29, minyo ug walay klarong trabaho, nga taga Villa Angelina, samtang ang suspetsado mao si Rufiano Cue alyas Rufing, hingkod ug silingan sa biktima ug usa ka drayber sa habal-habal.
Matud pa ni SPO4 Edgar Gomez sa Danao City Police Station nga ang biktima mao pay paggawas sa ilang balay ug samtang naglakaw kini sa dalan kalit lang gipusil sa suspek.
Nasabak sa dughan ang biktima sa bala sa wala hiilhing kalibre sa armas.
Gidala dayon sa mga silingan ang biktima ngadto sa Danao City District Hospital apan gibalhin kini ngadto sa Vicente Sotto Memorial Medical Center tungod sa kagrabe sa kahimtang niini.
Samtang ang suspek gipangita pa karon sa kapolisan kay misibat kini human sa hitabo.
Nasayran nga dugay nang nagkadumot ang duha gumikan sa personal nilang bangi.