Dugang pwersa sa kapulisan sa lalawigan sa Sugbu ang gipadala sa Daanbantayan gumikan sa tension karon sa maong dapit tungod sa panag-ilog karon sa pwesto sa kampo sa mga Loot ug Corro ug gikabalak-ang magsangka unya ang mga supporters ni Mayor Sun Shimura ug kaatbang niini nga si Augusto Corro.
Nasayran nga nahitabo ang lihok protesta sa kampo ni Shimura ingon man Corro human ang huwes sa dakbayan sa Bogo, Judge Antonio Marigomen nipagawas og desisyon nga nagmandong si Corro maoy migawas nga mananaog sa recounting sa mga balota sa nilabay’ng election.
Si Sr. Supt. Carmelo Valmoria, hepe sa kapulisan sa lalawigan sa Sugbu miingon nga ipatuman nila ang maximum tolerance pagbantay sa kahapsay ug kalinaw sa nahisgutang lugar.
Si Valmoria mitug-an sa mga tigbalita nga nipadala na siya’g usa ka platoon gikan sa Regional Mobile Group (RMG-7) sa dakbayan sa Bogo, samtang sa niaging semana nipadala usab siya’g mga sakop sa Special Reaction Unit (SRU).
Gitataw niini nga makapadala siya’g dugang polis gikan sa mga silingang police stations kun gikinahanglan ug gipaniguro niini nga ang mga protesters dili gyud makahimo’g kagubot sa maong lugar.
Samtang si Police Inspector Bonifacio Ariesgado, hepe sa Daanbatayan Police nipasalig usab nga kontrolado pa nila ang situation hangtud ning mga panahuna.
Gipalig-on na usab nila ang ilang intelligence monitoring ingon man mga sakop sa Barangay Intelligence Network (BIN) aron mapugngan kadtong mga way lingaw nga tawo nga gusto lang mosakay sa gubot sa krisis sa politika sa maong lugar.