Mga tanod nangulata, ‘na-mlanted’

Gireklamo sa usa ka dalaga ang mga tanod sa barangay San Antonio ning dakbayan tungod sa giingong pagdakop ug pag-“tanom” og ebidensya diha sa iyang kapuyo.

Si Sylvia Alcantara, 35, live-in partner sa gidakop nga si Jimmy Fornolles niadtong miaging gabii nagkanayon nga gikulata ug gi-planteran og ginadiling drugas ang iyang kapuyo hinungdan nga kini gitanggong.

Giasoy ni Alcantara nga iyang gisugo ang iyang bana pagpalit og manok-inasal apan sa pagpauli na niini giingong kalit lang gisikop sa mga tanod.

Nagtoo si Alcantara nga panimalos ang motibo sa mga tanod (ngalan gipugngan) tungod kay giingong nakulatahan usab sa manghod sa iyang hinigugma kaniadto ang hepe sa mga tanod.

Gisuwayan sa Banat News og kuha sa iyang habig  labot sa maong pasangil apan kini wala sa barangay hall midumili usab paghatag og contact numbers sa ilang chief tanod ang on-duty nga tanod kagahapon.

Kuhaan unta sa Banat News og pamahayag ang barangay kapitan sa San Antonio labot sa maong insidente apan kini giingong tua usab sa isla sa Bantayan.

Nasayran nga walay gihatag nga contact number si barangay kapitan Allan Masecampo ngadto sa buhatan sa ABC.

Dugang pasangil ni Alcantara nga hubog ang mga barangay tanod nga nidakop ug nikulata sa iyang hinigugma base usab sa asoy niini ngadto kaniya.

Sa pagsuwat ning balita pabilin pang gitanggong si Fornolles diha sa barangay hall sa San Antonio nga nag-antos sa mga bun-og nga naangkon sa nagkadaiyang bahin sa iyang kalawasan.

Gusto unta ni Alcantara nga ipakurasyon ang iyang hinigugma apan giingong dili mosugot ang hepe sa tanod nga si Mante.

Ang reklamante nidangop sa DYHP-RMN Cebu ug nagpatabang na sa angayan nilang buhaton nga mapakurasyunan si Fornolles.