Patay ang usa ka 19-anyos nga batan-ong lalaki human dunggaba samtang nagsayaw sulod sa diskohan atol sa kapistahan sa barangay Uling siyudad sa Naga niadtong Domingo sa alas 2:00 sa kaadlawon.
Ang biktima mao si Jose Marvin Candol, taga barangay Pangdan sakop sa nahisgutang siyudad samtang ang suspek mao si Renante Seguisabal, 32, molupyo sa sitio Apid sakop sa barangay Uling.
Matod ni PO1 Miguel Castañares sa Naga City Police dihang nahinabi sa Banat News ang biktima kauban sa lain pang mga batan-on sa nahisgutang lugar nagkalingaw og sayaw dihang kalit lang gisekreto og duol sa suspek kinsa niadtong tungura nagsayaw-sayaw sad ug gidunggab sa dala niining kitchen knife.
Ang biktima nga naka-angkon og samad dinunggaban sa iyang tuong kilid nahagba sulod sa diskohan hinungdan sa pagkasurpresa sa mga tawo ug nagkatibuwaag pagpanagan samtang ang suspek yano ra kaayo nga nisibat sagol sa mga tawo nga nagdaganay.
Nadala pa unta ang biktima sa South General Hospital apan paglabay sa pipila ka mga oras namatay gyud kini.
Ang suspek nasikop ra usab dayun nianang pagkaadlawan atol sa gipahigayung hot pursuit operation sa kapulisan ug dihang gisukit sukit nangangkon kining hubog siya ug wala siya masayod sa iyang gihimo.