Gidunggab patay sa hepe sa tanod sa makadaghang higayon diha sa dughan ang iyaha ra usab nga barkada nga kainom sa barangay Quisol siyudad sa Danao niadtong Biyernes sa alas 9:00 sa gabii.
Ang biktima mao si Cesario Bueno Giango, 65, nagpuyo sa barangay Tagaytay sakop sa nahisgutang siyudad samtang ang suspek mao ang hepe sa tanod sa barangay Quisol nga si Jimmy Buenauroa Dagatan, 53, nagpuyo sa barangay Suba.
Matud ni SPO1 Lolito Oliverio sa Danao City Police dihang nahinabi sa Banat News ang biktima ug suspek nag-inom pa kini nianang sayo sa gabii diha sa Tabo-an duol sa balay ni Maria Clara Ochea ug pagkahuman nanglakaw sakay sa ilang tagsa-tagsa ka motorsiklo paingon sa Poblacion.
Apan wala maabti og dugay nahibalik sa lugar ang biktima ug suspek ug mao nalay nadunggan sa mga nakasaksi nga nagkalalis ang duha human manganaog sa ilang mga motor ug nisangpot sa pagpanunggab.
Ang suspek mitahan dayon sa kapolisan ug nangangkong kalit siyang gituok sa biktima ug gisuwayan pa niini og parok ang iyang ulo sa bato, apan dihang kini mibuhi sa tuong kamot aron ibton ang kutsilyong giluklok sa hawakan niini iya kining gilayog.
Tungod kay edaran na ang biktima gilupig kini sa kusog sa suspek ug nailogan og kutsilyo ug gidunggab lima ka higayon.
Ang biktima nakaangkon og lima ka samad dinunggaban, tulo niini sa tuong bahin sa dughan, usa sa walang bahin ug laing samad dinunggaban sa walang bukton niini nga niresulta sa hinanali niining kamatayon.
Sila si SPO2 Ramir Oliverio ug mga kaubanan nga maoy niresponde sa crime scene naka-recover sa stainless nga kutsilyo nga dunay 9 pulgada ang gitas-on nga nagkadugo ug laing .38 kalibre sa pistola nga gituohang iyaha sa suspek.