Hepe sa traffic division sa dakbayan sa Talisay SPO4 Henry Obiso ang mibutyag nga mipahigayon na sila og operasyon batok sa mga PUJ nga molabyog o mopasakay og pasahero sa dili nila rota diha sa barangay Tabunok.
Ang grupo sa mga drayber nga dunay rotang Naga-Punta ang miduso sa ilang reklamo kabahin sa maong problema diha sa buhatan sa mayor sa dakbayan sa Talisay ug lungsod sa Minglanilla, hepe sa traffic division sa Talisay ug sa buhatan sa Land Transportation Office (LTO).
Dul-an sa 100 ka mga drayber ang mipirma sa nahisgutang reklamo batok sa mga PUJ nga dunay mga numero sa rota nga 12-L, 10-G, 10-H ug 09-G diin ang maong mga PUJ ang rota niini ang ngadto sa dakbayan sa Sugbu apan molabyog kini diha sa dili nila rota.
Si Romeo Anore, 37-anyos, drayber sa rotang Naga-Punta mibutyag sa Banat News nga nagsubay sila sa saktong rota ang maong mga drayber nga molabyog ang dunay kalapasan sa trapiko.
Ug sa maong sitwasyon ang mga drayber nga dunay rotang Naga-Punta ang naapektohan ilabi na ang ilang kinitaan sa matag adlaw.
Si Obiso sa iyang bahin, sa pakighinabi sa Banat News kagahapon sa buntag mitataw nga dihang nadawat niya ang maong reklamo mipahigayon dayon sila og operasyon batok sa mga molabyog o “traveling outline” ug gani mikabat na sa 30 ang ilang nasikop.
Matud ni Obiso nga ang drayber nga masikop nga dunay kalapasan nga “traveling outline” ang makabayad og sobra sa P1,000 nga multa.
Apan gibutyag ni Obiso sa pagkakaron temporaryo una silang mihunong sa ilang operasyon batok sa labyog tungod kay gamay na lang ilang Temporary Operator’s Permit (TOP).
Ug ang gisiguro nila karon sa operasyon ang mga traysikol nga mga badlongon kinsa anha mo parada gawas sa terminal diha sa parking lot sa Gaisano Fiesta Mall sa barangay Tabunok.
Si Obiso midugang nga gilauman nilang maabot na sa sunod adlaw ang mga TOP aron mobalik na usab sila sa ilang operasyon batok sa labyog.