Nasimhutan sa usa ka negosyante ang baho sa kamatayon human kini gisuwayan og patay apan ang gunman mipalpak kay ilong ray natapsingan niini pagpusil sa biktima kagahapon sa buntag diha atubangan sa litsonan store niini sa dalan Archbishop Reyes Ave. sa sitio NGA sa barangay Lahug ning dakbayan.
Ang biktima giilang si Leonardo Ramin, 57, tag-iya sa Helen’s Lechon diha sa maong dapit kinsa igo rang natapsingan sa taliwtiw sa ilong.
Duha ka wala mailhing mga lalaking sakay sa kolor pulang motorsiklo nga pulos nag-helmet ang gitumbok nga responsable.
Sumala pang SPO1 Geoffrey Gutual sa Homicide Section sa pakighinabi sa Banat News kasamtangang nagbarog ang biktima diha gawas sa iyang lechon store ug nagpaabot sa lechon nga iyang i-deliver.
Samtang kini nagbarog gawas sa iyang tindahan nihunong ang motorsiklong gisakyan sa duha diha sa tungod niini ug ang backrider wala mokanaog.
Wala lang kini tagda sa biktima ug sa kalit niyang paglingi mipaka ang usa ka buto hinungdan nga naigking siya ug kalit nga midagan pasulod sa tindahan samtang ang mga gikatahapan daling mipasirit sa motorsiklo padulong sa dakbayan sa Sugbu.
Matud pang Gutual wala magpahatud ang biktima bisan na sa Emergency Rescue Unit Foundation gumikan sa kahadlok ug sila ray gipaabot niini una pa kini misugot nga magpatan-aw sa tambalanan.
Nasayran nga ang taliwtiw gyud sa ilong niini maoy gitapsingan sa bala hinungdan sa gamay'ng garas niini ug dako ang pagtuo sa kapolisan nga kung wala kini makalingi atol gyud sa pagbuto sa pusil hayan maayong pagkaigo niini sa nawong o ba kaha sa ulo.
Si SPO2 Rey Cuyos nitug-an sa Banat News nga ilang gisusi karon ang karaang panagbangi tali sa biktima ug sa kasikbit nilang tindahan gihapon og lechon ingon man ang uban pang mga anggulo.
Niadtong milabay'ng Disyembre 31, 2007 base sa rekord sa Homicide Section ang anak sa biktima nga si Junard Ramin, 28, gitumbok nga maoy nipusil patay sa bana sa tag-iya sa Methos Lechon nga si Arrol Adolfo.
Nadakpan si Junard niadtong maong hitabo ug positibong gitumbok sa mga testigos ug kabanay ni Adolfo nga maoy suspek sa pagpatay kang Arrol.