Nalagpot, nalatayan sa trak tipi

Nabuak ang ulo sa usa ka lalaki nga angkas sa motorsiklo samtang naangol sab ang drayber niini dihang nalamba ang ilang motorsiklo sa karsada ug nalatayan sa six-wheeler truck diha sa barangay Mujon lungsod sa Sta. Fe, isla sa Bantayan niadtong Miyerkules sa alas 3:00 sa hapon.

Ang namatay mao si Jovannie Tonton Alon, molupyo sa Basahun, Sulangan, lungsod sa Bantayan samtang ang drayber sa motorsiklo nga si Raymund Demicillo, 22, nakaangkon og dakung samad sa ulo ug nalandig sa Bantayan District Hospital.

Samtang ang drayber sa Isuzu Elf nga nakaligis sa biktima mao si Joel Carillo De Pedro, 35, taga Alonzo, Madredijos.

Nasuta sa imbestigasyon nga hubog ang duha ka mga biktima ug walay lisensiya ang drayber niini nga si Demicillo nga nagmaneho sa Honda XRM-125 nga wala say plate number.

Matud ni SPO4 Felix Lapera, acting chief sa Sta. Fe Police Station dihang nahinabi sa Banat News gikan nag-inom sa pantalan sa barangay Talisay ang mga biktima ug kusog kaayo ang dagan.

Sumala pa niini base sa pamahayag sa mga saksi nag-ekis ekis ang dagan sa motorsiklo ug bisan sa gutter ilahang paagion ang motor ug pag-abot sa maong dapit kalit lang nilupad ang motorsiklo ug nalabay ang mga sakay niini.

Si Alon nalagpot tunga sa karsada ug nauna og tugpa ang ulo una pa kini malatayi sa trak nga gikan sa Bantayan paingon sa Sta Fe.